టీ20 వరల్డ్‌కప్ జట్టులో శ్రీచరణి, అరుంధతి స్థానం

భారత మహిళల టీ20 వరల్డ్‌కప్ జట్టులో తెలుగు ఆటగాళ్లు ప్రత్యేకంగా నిలిచారు. శ్రీచరణి తొలిసారి ఎంపిక కాగా, అరుంధతి రెడ్డి తన స్థానం నిలబెట్టుకుంది. తాజాగా ప్రకటించిన జట్లలో ఈ వివరాలు వెల్లడయ్యాయి. ఇంగ్లాండ్, వేల్స్‌లో జూన్ 12 నుంచి ప్రారంభమయ్యే టీ20 వరల్డ్‌కప్ కోసం జట్టును ప్రకటించారు. అలాగే మే 28 నుంచి ఇంగ్లాండ్‌తో మూడు టీ20 మ్యాచ్‌లు, జూలై 10 నుంచి ఒక టెస్ట్ మ్యాచ్‌కు కూడా జట్లు ఖరారయ్యాయి. శ్రీచరణి గత వన్డే వరల్డ్‌కప్‌లో 14 వికెట్లు తీసి జట్టు విజయంలో కీలక పాత్ర పోషించింది.

అదే ప్రదర్శన ఆమెకు టీ20 జట్టులో చోటు కల్పించింది. టెస్ట్ జట్టులో కూడా ఆమెకు అవకాశం ఇచ్చారు. అరుంధతి రెడ్డి గత టీ20 వరల్డ్‌కప్‌లో 7 వికెట్లు తీసి మంచి ప్రదర్శన చేసింది. ఆమె ఎకానమీ 6.50గా నమోదైంది. దీంతో ఆమెను మళ్లీ జట్టులో కొనసాగించారు. జట్టుకు హర్మన్‌ప్రీత్ కౌర్ కెప్టెన్‌గా, స్మృతి మంధాన వైస్ కెప్టెన్‌గా ఎంపికయ్యారు. వికెట్ కీపర్ యాస్తిక భాటియా, పేసర్ భారతి ఫుల్మాలి, కొత్తగా నందిని శర్మకు అవకాశం లభించింది. హర్లీన్ డియోల్‌ను జట్టులో నుంచి తప్పించారు.

గాయాల కారణంగా అమంజోత్ కౌర్, కాశ్వీ గౌతమ్ ఎంపిక కాలేదు. సీనియర్ పేసర్ పూజా వస్త్రాకర్‌కు కూడా చోటు దక్కలేదు. రెనుకా సింగ్ పేస్ దాడికి నాయకత్వం వహించనుంది. అరుంధతి రెడ్డి, క్రాంతి గౌడ్ ఆమెకు తోడుగా ఉంటారు. నందిని శర్మ మహిళల ప్రీమియర్ లీగ్‌లో ఢిల్లీ క్యాపిటల్స్ తరఫున మంచి ప్రదర్శనతో జాతీయ జట్టులోకి వచ్చింది. ప్రభికా రావల్ జూలై 10 నుంచి లార్డ్స్‌లో జరిగే టెస్ట్ మ్యాచ్‌కు ఎంపికైంది. హర్లీన్ డియోల్ ఇండియా ‘ఏ’ జట్టుకు నాయకత్వం వహించనుంది.

భారత్ తన టీ20 వరల్డ్‌కప్ ప్రయాణాన్ని జూన్ 14న బర్మింగ్‌హామ్‌లో పాకిస్థాన్‌తో ప్రారంభించనుంది. ఇక మరోవైపు థామస్ కప్‌లో భారత పురుషుల బ్యాడ్మింటన్ జట్టు సెమీఫైనల్లో ఫ్రాన్స్ చేతిలో 3-0తో ఓడింది. తొలి సింగిల్స్‌లో అయుష్ షెట్టి, రెండో సింగిల్స్‌లో కిడాంబి శ్రీకాంత్, మూడో సింగిల్స్‌లో హెచ్‌ఎస్ ప్రణయ్ ఓడిపోయారు. దీంతో మిగతా డబుల్స్ మ్యాచ్‌లు అవసరం లేకుండా పోయాయి. ఈ ఓటమితో భారత్ కాంస్య పతకంతో సరిపెట్టుకుంది. గతంలో 1952, 1955, 1979ల్లో కూడా భారత్ కాంస్య పతకాలు సాధించింది.