'ఇడుపుకాయితం' వివాదం ఏంటి?

ప్రియదర్శి, ప్రముఖ ఫోక్ సింగర్ నాగదుర్గ ప్రధాన పాత్రల్లో రాబోతున్న సరికొత్త చిత్రం 'ఇడుపు కాయితం'. సుకుమార్ రైటింగ్స్ సమర్పణలో బన్నీ వాస్ (బన్నీ వాస్ వర్క్స్) ఈ సినిమాను నిర్మిస్తున్నారు. నూతన దర్శకుడు వంశీరెడ్డి దొండపాటి దర్శకత్వంలో గ్రామీణ తెలంగాణ కుటుంబ నేపథ్యంతో ఈ చిత్రం రూపొందుతోంది.

అయితే, ఈ సినిమా టైటిల్ ప్రకటించినప్పటి నుండి సోషల్ మీడియాలో దీనిపై పెద్ద ఎత్తున చర్చ, వివాదం నడుస్తోంది. తెలంగాణ వాడుక భాషలో 'ఇడుపు కాయితం' అంటే విడాకుల పత్రం అని అర్థం. పూర్వ కాలంలో భార్యాభర్తలు కలిసి ఉండలేమని నిర్ణయించుకున్నప్పుడు పెద్ద మనుషుల సమక్షంలో విడిపోవడానికి ఒక ఒప్పంద పత్రం రాసుకునేవారు, దాన్నే ఇడుపు కాయితం అనేవారు. ఈ పదం ఆంధ్ర ప్రాంతంలో అంతగా పరిచయం లేకపోవడంతో, కొందరు నెటిజన్లు సోషల్ మీడియాలో ఈ టైటిల్‌పై వ్యంగ్యంగా కామెంట్లు చేయడం, దానికి తెలంగాణ నెటిజన్లు కౌంటర్లు ఇవ్వడంతో ప్రాంతీయ భాషా వివాదం రాజుకుంది. ఈ వివాదంపై నిర్మాత బన్నీ వాస్ స్పందిస్తూ.. కథకు తగ్గట్టుగానే ఈ టైటిల్ పెట్టామని, సినిమా పేరును లేదా కథను మార్చే ప్రసక్తే లేదని స్పష్టం చేశారు. ప్రతి ఇంట్లో ఉండే ఒక కామన్ సమస్య చుట్టూ ఈ కథ సాగుతుందని, సబ్‌టైటిల్స్‌తో దేశంలో ఎక్కడ వేసినా అందరికీ కనెక్ట్ అయ్యే గ్లోబల్ కంటెంట్ ఇదని ఆయన ధీమా వ్యక్తం చేశారు. ప్రస్తుతం ఈ వివాదంతో 'ఇడుపు కాయితం' సినిమా ఇండస్ట్రీలో మరియు ప్రేక్షకుల్లో హాట్ టాపిక్‌గా మారింది.